مُنفذتي وهلاكي بقلم الكاتبه إيمان شلبي
قرب منه آدم بلهفة:
-طمني
ابتسم الدكتور وربت علي كتفه:
-الف مبروك العملية نجحت وهو طالب يشوفكم وخاصه مراته
طول ما هو في البنج مش بينادي غير اسمها
آدم بفرحه:
ـ الحمد لله
شهقت تولين وهي بتحط ايديها علي بوقها فقرب منها آدم بسرعه وقلق:
-مالك
تولين بهستريه:
-انا لازم تمشي
رد بجمود:
-واجهي متهربيش!
هزت راسها بخوف:
-مش هقدر
-غيث بيحبك
-اول ما يعرف انا مين هيكرهني
-يمكن يسامح!
-ويمكن يكرهني ويكره نفسه ويكره أنه فتح من الأساس
اخدت نفس عميق ومسحت دموعها:
-ارجوك يا آدم خليني امشي
شاورلها بهدوء:
-امشي
-ممكن طلب اخير
-اطلبي
خرجت من شنطتها ظرف وحطته في أيده وهي بتقوله بحشرجة:
-خلي غيث يقرأ ده
استلم منها الظرف وهز رأسه بملامح جامدة بعدها لف ودخل
★★★★★★★★★★★★★★★★★★★★★★★★
اول ما دخل كان غيث عيونه علي باب الأوضه،ملهوف،متوتر،مبسوط،مشتاق!
لكن اول ما شاف آدم ضحكته اختفت وسأل بلهفه:
-تولين فين؟!
ـ مشيت
-نعم مشيت ليه وراحت فين و….
قاطعه وهو بيحط الظرف في أيده
ـ سابتلك ده
مسكها غيث وأطراف بترتعش وقال:
ـ إيه ده؟
ـ رسالة
فتح الورقة بصعوبة، وبدأ يقرأها:
“غيث.
أنا عارفة إنك أول ما تفتح عينيك هتدور عليا.
وعارفة إنك هتسأل أنا ليه مش موجودة.
انا اسفه اني مكنتش شجاعه كفايه وهربت النهاردة زي ما هربت يوم الحادثه…ايوه ياغيث أنا البنت اللي خبطتك.
أنا اللي سيبتك يومها ومشيت
وأنا اللي سرقت منك نورك وهربت
انا اللي عطيتك الأمل وسحبته منك
انا جلادك وانا ملاذك يا غيث
مُدمرتك ومُنقذتك!
كل كلمة قلتهالك عن حبي ليك من البداية كانت كذبة…
لكن اللي حصل بعد كده مكانش كذب.
أنا فعلًا حبيتك.
حبيتك لدرجة إني اتمنيت تفضل كده طول العمر
يمكن وجودي في حياتك كان بأرادتي بس اناكنت عايزة أصلح اللي عملته،اصلحه وامشي بهدوء،مكنتش اعرف انك هتحبني ولا كان في خيالي اني ممكن احبك،بس عكس كل توقعاتي حبيتك
حبيت هدوئك،صمتك،خوفك في حضني،عصبيتك،انطوائك
حنيتك رغم قسوه كلامك عني وعن انك عايز تنتقم!
سامحني يا غيث
ولو اني عارفه انك استحاله تسامحني
انا خذلتك مره لما سيبتك غرقان في الضلمة ومشيت
ومره لما عطيتك الأمل وسحبته منك
انا هربت لاني خوفت
خوفت اشوف نظره كُره في عيونك بعد ما كنت بشوف نظره الحنين والحب واشتياقك انك تشوفني!
بحبك